Monday 7 November 2016

شباك ع كفر الرمان

كفر الرمان
كفر الرمان اسم، والاسم مش جاي من الرمان تبع الاكل، بلد صغيره شمال عنبتا في محافظة طول كرم، رحنا ع البلد علشان تجربة شخص، "عبد" ابن كفر الرمان، وابن اصيل، لما رجع من الغربه لقي اهل البلد، بيهدوا بيوتهم القديمة المبنيه ع الطريقه الفلسطينيه وبينوا بيوت جديده، حاول يقنعهم ومقتنعوش، بلش عبد يشتري البيوت، ويرممهن، لتنه خلق ثقافه جديده في البلد، وصاروا اهل البلد يفكروا مرتين قبل ما يهدوا بيت قديم. 

انا بحب البيوت العتيقه، وبحب الناس الي زي عبد، في بيت من البيوت الس اشتراها عبد بده يعمله بيت للكتاب والفنانين او اي فنان بحب يجي يسكن في شهر او شهرين، مقابل انه يعطي من وقته وقت لاطفال كفر الرمان، شكرا عبد ع هالفكره الجميله، وانشالله رح اجي اخلص كتابي في بيتك، وباقي بيوته افكار، ومن البيوت رح يعطي لشباب من القريه علشان يتزوجوا فيهن. 

من ثلاث ايام وانا بفكر في اللفه الصغيره الي لفينها مع عبد، ومن الاستراحه الي اخذتها عالجنبيه في بيته، معلق ع الجدران افكاره، زي كا انهن بروايز العيله، في علاقه رهيبه موجوده بين الانسان والبيوت بتقدر تلاقيها ع جدران عبد وفي احاديثه. 

حاول انه يجيب طلاب جامعه النجاح الوطنيه تبعين الهندسه، علشان يساعدوه بالترميم وبالافكار وما زبطت، لو عندك فكره تساعده فيها بكون شي رائع، انا فخور بهاي الفكره وبتمنى من كل قريه في البلد يصير فيها افكار زي هيك. 


Sunday 6 November 2016

شباك ع كور

كور
قرية فلسطينية تابعه ل محافظة طول كرم، ​وهاي البلد فيها قصور وابراج و مكان فعلا جميل، كانت من قرى الكراسي في ايام العثمانينين، وضلوا ال الجيوسي ساكنينها وضضلوا في قصورهم الي ورثوها عن اهلهم، واليوم القصور بتواجه خطر كبير في الانهيار، والسبب هالمرة من المحاجر الفلسطينية في المنطقة الي بفجروا الاراضي تحت القرية، هاي التفجيرات بتطلع الصخر من الارض علشان اصحاب المحاجر يعرفوا يطلعوا منه ثروتهم، وبهالحالة ح تروح قصور ال الجيوسي في خبر كان، احتجوا اهل البلد قدام مجلس الوزرة قبل فترة قصيرة وما تغير شي.
وللأسف القرية مش معروفة، ومشاكلها مش معروفة في البلد، ويمكن الامل الوحيد عند اهالي القرية بضل في جهود اي حد مهتم فيهم وبده يساعد.
الكور بعيدا عن هالقصة، قرية حلوة سكانها 300 شخص وجاي ع منطقة جبلية، جبال وسهول ومناظر مذهلة، والقعدة في قصور الجيوسي في الكور اشي فعلا برد الروح.

روح ع البلد شوفها واحكي لصحابك

Friday 4 November 2016

شباك ع سبيسطية

في سبيسطيه، في كثير تاريخ وحكي تاريخ، ولأنه تاريخنا موضوع كثير حساس، فعليا احنا متقاتلين عليه مع الاسرائيلين في مقام سيدنا يحيى، او مسجد سبيسطية القديم، في المسجد في مسجد وكنيسه، وهناك تمثال ل الاله هيرودس وبعل، تمثال الاله سلومي مع اكم تمثال صغير، سرقوهن اليهود في ال١٩٨٧ واخذوا حارس المقام الي هو حكالنا قصته، مدحت الكايد، كمان د. نزار الكايد حكالنا قصه المستوطنين الي الي كل شوي بيجو ع المناطق الاثريه الي في سبيسطيه محميين بجيش الاحتلال، بعملوا طقوس وانهم اعلنوا عن بدايه شهر ايار ٢٠١٧ موعد علشان يبلشوا حفرياتهم حسب ما اعلن الموقع الالكتروني لجامعه ارائيل، انهم اخذوا تصريح من الحكومه الاسرائيليه. 
لسا في جولتنا وقت واثار في سبيسطية وكثير حكي ممكن ينحكى وكثير تاريخ لازم ينحكى، بس الاهم بالنسبه الي انه اثار سبيسطيه انسرقت مره ويمكن اكثر، وحاليا بحاولوا يسرقوا الاثار والمكان، وممكن يسرقوا اكثر 

سبيطية ع الحفه، عايشه بين تحافظ ع حالها بقدراتها المحدوده، وبين المستوطنين الي بيجوها بباصات ومخططات، عندهم حجة انها ارض ج، وحجة انها جزء من دولتهم، وحجة انها مقدسة، والي مركنين عليه اكثر انه احنا مش عارفين شو بصير. 

احمل حالك وروح ع سبيسطيه، اتعرف عليها وع السياحه الدينيه والثقافية والتاريخيه الي ممكن تقدملك اياه، واعزفها، علشان ما بنقدر ندافع عن بلد بنعرفهاش. 

 

Tuesday 25 October 2016

البلد من شبابيك الباص

 شباك
 سوشلجية البلد
 واد عين الفوار
 برضو واد عين الفوار
 توثيق
 القصب والتكنولوجيا
 لعبتنا التوثيق
 عين فارة
 أسمي مكتوب
 جمل المقام
 صحراء الاغوار
مقام النبي موسى


#فلسطين
#باص_السوشال_ميديا #سولجية_البلد #عين_الفوار #عين_فارة #وادي_القلط#مقام_النبي_موسى #موسم_النبي_موسى #مقام_ستنا_عائشة #الاغوار #اريحا#طواحين_السكر #جبل_التجربة #دير_القرنطل #الجميزة #أنا_حر #Palestine#SMBus #Jawwal
#أمير_صبيحات #هيك_أجت

أنا بحكيلكم قصة الباص ٤

زي كل مره باص، وسوشلجية وقضيه مهمة وانا جاي مع الباص، كل سوشلجي او ناشط عنده طريقة مختلفه، وهاد احلا شي بهاد الباص، الباص طلع وراح ع عين الفوار، وهي في البدايه عين، فيها بركة كبيره، المي فجأة بتبلش تغور منها وبشويه دقايق بتفضى، وبترجع بتفور، وبتفضى وبترجع بيفور، مالهاش غير هالقصهة، وبتنزل المي في واد رهيب من القصب والسِحر، في نص الغور، واد جميل،،، الجيش الاسرائيلي أطلع البدوا الي سكنينه في أول الثمنينات، وعملوها محمية، علشان هيك انت مضطر تتحمل البنت الي بتحكيلك كيف تحافظ ع بلادك بالعبري، كالعادة سمة بدن تقليديه بيوم فلسطيني مثالي. 
بننزل مشي لعين فاره، تبقى ماشي ع الحفه، والمشي ع الحفه اكيد تكون اتعلمته بما انك فلسطيني، بحدك ماسوره فخار رهيبه بتنقل مي، في اماكن مكسره وفي اماكن رح تتكسر بعد شوي إلا اذا انتبهنا، وبتنزل في واد القلط تمشي فيه تحت القصب وفوق المي، لحد ما توصل عين فارة، وعين فارة اذا مشفتهاش لحد هس، احمل حالك ع السريع وروح، هي بتشبه الجنة، فعلياً من الاندهاش بتلحقش ع الاشيا الي بدك تعملهن، هناك بتقدر تشوف منظر يريح العين، تحط اجريك للسمك يعملك مساج، وبتقدر تسبح، او توقع في المي، وبتروح وبترجع تحكيلي شو ساويت. 
بمشي الباص ويا دوب لحقته، وبضل رايح ع مقام سيدنا موسى، ومقام سيدنا موسى مقام كبير ورهيب، بتوصله شكله من بعيد زي السراب، أخضر في نص الصحرا، بتوصله بتفوت ع الطابق الارضي الي فيه المساجد وقبر سيدنا موسى، في الطابق الثاني في غرف للزوار الي بيجوا يحيوا طقوس موسم النبي موسى، وفي طابق تحت الارض فيه اسطبل، موسم سيدنا موسى، كان موسم عسكري، ببلش في الخميس الثاني في كل نيسان، وفيه بتبارزوا الشمال والجنوب (جبل نابلس وجبل الخليل) لمده اسبوع، وبيحتفلوا، وكان الهدف منه حماية القدس، ومن يوم ما برطانيا منعت الموسم، راح علينا وهات دبرها عاد، ومن جديد صار الموسم موسم ثقافي، من المقام بتشوف قبور للناس الي اتوفوا خلال الموسم، وهن فعلاً تحف معماريه، جنوب المقام في مقام ستنا عائشة الي هي حجة تركية -الله يرضى عليها- كانت تيجي في الموسم وتذبح علشان تطعم الناس المشاركين ع طول الاسبوع، وفي مقام ثاني غربي المقام، واحنا فايتين كان في سياح من اندونيسيا، واحنا هناك اجوا علينا سياح من تركيا، هم اجوا كل هالطريق واحنا مش منتبهين. 
ما علينا، طلعنا ع اريحا ع طواحين السكر ودير القرنطل، في كثير حكي تاريخ وجغرافيا لازم ينحكى عن كل مكان من هدول، بس الي ما بنحكى هو التجربه، التجربة لازم تعيشها انت، لازم تروح في بلدك سياحه بيئية، وكمان دينيه، خذ من هناك كثير ذكريات وتجارب رح تتذكرها العمر كله واتذكر دايماً، انه رح تتعب واع رأي حمزة "التعب زي الوسخ لما تتحمم بروح"
#فلسطين
#باص_السوشال_ميديا #سولجية_البلد #عين_الفوار #عين_فارة #وادي_القلط #مقام_النبي_موسى #موسم_النبي_موسى #مقام_ستنا_عائشة #الاغوار #اريحا #طواحين_السكر #جبل_التجربة #دير_القرنطل #الجميزة #أنا_حر #Palestine #SMBus #Jawwal#أمير_صبيحات