اضراب الاسرى واوجاع التطنيش

في اليو الـ ٦٦ لأضراب الاسير خضر عدنان كتبت (هيگ أجت) بعنون /خضر عدنان واوجاع التأيد/ بس بعد أضراب هناء الشلبي وباقي الاسرى، أختلف الوضع. 

جامعة النجاح الوطنية، الصرح الوطني الاول وهاي الدواوين باليوم الـ ٧١ لأضراب جايين يطالبو بمنع الفيزون، خلولي الاسرى شوي ع جنب وبنرجع لموضوعنا. 

اعزائي في كلية الشريعة، انتو بتفكروا انو الوطن بتحرر اذا البنت لبست جلباب، والاسوء انكم بتفكروا حالكم بتفهموا بالدين بس تعو اخرفكم عن الدين، (لا أكراه في الدين) ولا هاي بطلت يا شباب، وبالنسبة (لغض البصر) ولا ما بصير يمكن بغلبكم، وأكثر،،، بالنسبة للشباب الي بطلوناتهم ساحلة معلقتوش، الي بيجوا بشورتات مش مشكلة أما هاي لحالها من دون باقي الاشيا علقتو عليها 

أما الاسرى حبايبنا الاسرى الله يرضالي عليكم اضربولكم شهرين زمان تا نحل موضوع الفيزون ومحنة شباب كلية الشريعة 

شبكة شباب

من زمان صرلي مش كاتب هون، يمكن علشان زهقت من الاشياء السلبية في البلد، بس اليوم الموضع ايجابي وحابب احكي عنه. 

الخميس بدي اطلع ع اريحا علشان مؤتمر شبكة شباب كبرنامج لمنتدى شارك، طبعاً اول سمة بدن كانت انو بدك تستنى التكسي ساعتين تا تطلع من جنين، والثانية ع حاجز الحمرة الي ما الهم شغلة في الدنيا غير يسمو بدنك، بس اول ما وصلت هناك وشفت الشباب وكيف بفكروا في المستقبل نسيت كل سمات البدن. 

هدول الشباب هم اعضاء مجالس محلية شبابية او اعضاء شبكة شباب، عندهم انل وتفاؤل، والاهم من هيك عندهم رؤية الي هي  "غداً أفضل"، وعندهم خطة عمل علشان تصير رؤيتهم حقيقة، عندهم أدراك للواقع وأتصال بقضايا بلدهم ع سبيل المثال مجلس شبابي بيت أمر، خطتهم عن المي الي الاسرائيلين بحاولوا يسيطروا عليها في منطقتهم، وكمان بحاولوا يفعلوا قضية أختطاف الاطفال من منطقتهم، وبحكوا عن طفلين حكمت عليهم محكمة اسرائيلية بالابعاد، شكراً شباب بيت أمر البلد بدها كثير ناس بتفكر زيكم. 

من جنين كان في افكار برضو رهيبة زي فكرة الاحتياجات النفسية للمواطنين، ومبادرة تاريخ المدينة ع آرمات كبيرة، وكثير مبادرات ثانية في كل البلاد بتنتهي بمستقبل أفضل، جد شكراً الكم شباب. 

في النقاش السياسي مع اللواء توفيق الطيراوي، الشباب أثبتوا انو عندهم وعي سياسي جيد في القضية، يمكن ما بكفي بس بضل بذرة ممكن لو أعتنوا فيها قادتنا يصير الوضع افضل بكثير. 

بالنسبة لتفاعل الشباب مع قوانين الاكاديمية الامنية (جامعه الاستقلال) كان لازم التزام أكثر شباب، وحتى بالنسبة للأكل، لازمنا كشباب انو نتكيف مع كل الظروف علشان أحنا بدنا نبني وطن. 

وكمان الشباب هدول كان الهم قدرة انهم ينسقوا وينفذوا ويحافظوا ع نشاط كبير الي هو "حملة زوروا الاغوار" النشاط كان انو ننزل ع الدراجات من نبع العوجا للجفتلك، الجيش كان خايف منكم علشان هيك حاول يمنعكم، بس الحفلة الي كانت في الجفتلك حكتلهم انو أرادتنا أقوى من دولتكم، شكراً لأنكم حكتوا لفلسطين أنو لسا في أمل. 

الزهار، مقابلة ع النار

كان عضو المكتب السياسي لحركة المقاومة الاسلامية حماس في مقابلة ع فضائية العربية، وبما انو الزلمة كان وزير خارجية، فحبيت اسمع شو بحكي ويا ريتني ما سمعت.  

ملاحظة؛ انا هلأ بعبر عن رأي شب 

فلسطيني شاف قائد بخبص، بتقدر تعتبرني عنصري او ضد حماس، او شو ما بدك مش مهم، المهم توصل الفكرة. 

طبعا رح يبلش الموضوع بالحكي عن اتفاقية المصالحة الوطنية، وهو حضرته بحكي انو اتفاقية الدوحة، بتنقض التعهد الي صار بإتفاقية القاهرة، طب شو جابركم عليها مثلاً؟؟

وبعدين الزلمة بحكي انو في الحركة متفقين ورأي واحد وعاد هاد الحكي ثلاث مرات في المقابلة، وكمان حكى انو هم اتفقا في الدوحة بدون ما يتفقوا داخلياً !! في كثير تساؤلات طلعت في دماغي، مثلاً انت شو بتخرف وشو بتأكد؟؟ وبعدين مش مشعل وهنية بمثلوا الحركة ولا كيف؟؟ والاهم بنظر سعادتك، المصالحة ولا اتفاق القاهرة؟؟

بعدين ليش الثانين دايماً هم الغلطانين؟؟ نفسي اشوف اشي غلط بهاي البلد غير (هيگ اجت) وصاحبها. 

فتح انقلبت ع الربيع الفلسطيني الي بلش بفوزكم في الانتخابات،،، ع اساس انو انتو جيتو بمطلب الشعب مش علشان الناس حبوا يغيروا طعم الحكومة، وقلنا أمر الله، بس انو تيجي تحكيلي انو فتح بتمارس (الفوضى الخلاقة) لأ كثير هيك، بعدين هيك بلزم يكون في اجتماعات ماسونية ودواوين واحنا مش فاضين. 

وكمان فتح بتتدخل بشؤون الربيع العربي وأنت لأ، وهو السيد ابو مازن عمل اربع مقابلات بهاد الاسبوع وما رضي يحكي عن الربيع العربي، واحنا ع فكرة ما فهمنا

 انو حضرتك بتدعم النظام السوري الي رح السورين يرجعوله لما يعقلوا، حسب فهمي المتواضع. 

وطبعاً ما بصير يحكي السيد الزهار انو الي بنزل ع الانتخابات بنزل ع السجن، ولا زم يكون ضمان انو ما ينزل،،، انا اتفاجئت بالحكي، بس الزلمة وضح وحكى أنو الجانب الاسرائيلي مش متعاون من اجل انجاح المصالحة،،،،، بلله عليك!! 

اه هو الاسرائيلين بدعوا الله انو تم المصالحة  

وبعدين منتي مش معترف فيهم 

وبدك تزتهم بالبحر 

وكل هالقصص كيف بدهم يضملونك نجاح المصالحة، فلا بد انو نحكي انهم اعدائنا. 

وقصة انو العرب مش من مصلحتهم يصتدموا مع العالم الاسلامي، زي انو الواحد يخش بحاله مثلاً؟؟

مش رح اضل احكي عن كل شي انحكى، بس سيدي، شعبنا بفهم سياسة وفاهم شو بصير، وأي ولد في هالبلد بعرف يطلع كل الكوارث في الخطاب، 

سيدي الزهار، بدكمش المصالحة احنا كشعب مش فارقة معنا كثير، بس الي بهمنا انو متحملوناش جميلة فيها وتحلونا من قصصكم، وما تعتبرونا بنفهمش لما تحكوا.

بعض صور المقابلة 

بتمزح معي

بتمزح معي،،، هاي الكلمة بتنحكى لما تكون انت مش راضي تصدق الشي الي سمعته من شوي، أو أنو خيالك الواسع اصغر من انو يتحمله

أما أنا بحكيها علشني بحاول اقنع المجتمع الي بحدي وخاصة الي بحكيلي القصة اني متفاجئ، بس ع خبر الوزير حكيت (بتمزح معي) ومكنتش متفاجئ، يعني حملة المقاطعة ضد المستوطنات مش ضد اسرائيل، هاي انا متفاجئتش فيها، بس في مجال تفهموني اياها، المستوطنات ع ارضي واسرائيل مش ع ارضي، ولا انو الجيش الي بقتلنا من المستوطنات ولا من اسرائيل، بما انو انفتح الموضوع في معاير بتحدد قديش نسبة الوطنية عند الشخص الوطنجي في البلد؟ 

بعدين يا معالي الوزير ممكن تحدد موقفك، أنا كتبت (بهيگ أجت) سابقة انو حضرتك حكيت عنهم جيرانا وبعدين سبيت عليهم وهس جاي تقعد معهم، يعني ممكن نفهم شو خطوة معاليك القادمة، بعدين هو انت هالقد هامك التبوزينا تا ترد، خلص طنش الموضوع وانسى. 

بس الي مش عارف افهمه انو هاي الجلسات ليش ما بتنكتب وبتنتشر مش برضو يمكن يكون من حق الشعب يعرف شو بتساوا في هاي البلد؟ يمكن اكون بتفلسف. 

لافتات

هي مش اول لافته غلط في البلد بس قامت قيامتها، اه الي مكتوب عليها ( دولة ديقراطية واحدة لـ ٥ مليون عربي و ٦ مليون يهودي) بصراحة هي لافته وقحة، بس من ثلاث سنين كان في لافته عن حل الدولة الواحدة مكتوب عليها (دولة واحدة لشعبين) مش فاهم ليش ما حدا انحر عليها، والله فاهم انا بس بتسأل زي ما تحكوا، كنا بالخريف العربي هس صرنا بالربيع وفكرة الثورة سهلة والاحتجاج وكل هالاشياء، ع سيرة اللافتات في وحدة في شارع حيفا في نابلس مكتوب عليها (متئيم لي) وانا مستفز انو مكتوب عليها بالعبري.  

هناء الشلبي 

هو انت الثانية لازم هيك تعملي فينا، شكله لازم تصبري كمان اكم شهر علشان يبحثوا موضوعك، ويعطو امر للجهات المعنية للمباشرة بإجرائات الافراج عنك، أو انو حماس تشوف نتائج تبادلها الي عملته بس علشان تلهي الناس عن ايلول، او يشوفوا المصرين قديش اهميتهم بالاتفاق، او طلاب النجاح يتقاتلوا مين بده يعملك مظاهرة اول، مع انو قلبي معك وبدعيلك كل يوم، بس في بالي سؤال هو أنت (بتمزحي معنا) لازم تحرجينا مثلاً؟؟

خضر عدنان وأوجاع التأيد

غير انو الزلمة قعد قريب الشهر واحنا بنعرفش انو مضرب عن الطعام، جايين نتخوث، جامعة النجاح الوطنية، الصرح التعليمي الاكبر، القلعة التي انجبت قادة الوطن، وكل هالحكي الفاضي الي قعدت خمس سنين اسمعه وانا ادرس فيها،،، انو جامعة النجاح، شو بالنسبة لخضر عدنان، او لهدم الاقصى، أو أي أشي ثاني؟؟؟

بعد الكارثة الي صارت في سنة ال ٢٠٠٧ في جامعه النجاح وانقتل شب على مشكلة حزبية وراح الحزب الثاني حرق الجامعة، وين صرنا شو استفدنا، شو؟؟

اليوم ٦٤ للإضراب، شباب اتجمعوا في الحرم الجامعي ونزلوا بمسيرة،٦٤ يوم لأول شي في الجامعه!!

اليوم ٦٦ للإضراب، تجمع اليسار مع الجهاد الاسلامي بوقعوا بيان تعليق الدوام من الساعة ١٢ لنهاية الدوام للتضامن من خضر عدنان، وبطلعوا تجمع بلفوا الجامعة وبسبوا ع اسرائيل وع الجامعة، حركة الشبيبة الطلابية ومجلس اتحاد الطلبة، بنزلوا بيان تعليق دوام وبرفضوا فيه البيان الاول، وبطلعو هم تجمع وبلفوا وبصيحوا وبسبوا ع بعض الكتل، وبوصلوا منطقة بلتقوا فيها مع التجمع، وبتتوتر الاوضاع بشكل كبير بطريقة بتشبه مأساة ال ٢٠٠٧، بيجي حل غريب للمشكلة الي هو قرار الافراج عن الاسير خضر عدنان، وبحمينا من الكارثة.

 

ما بعد الافراج 

الجامعه بتنزل خمس قرارات فصل لشباب في المسيرة، ومتابعة امنية لبعض الشباب الي هم فعلياً مش طلاب في الجامعة، وطبعا ثاني يوم الصبح بتكون هاي القرارات التغت، فأنا مش فاهم شو معناها، مسكتوهم من الايد الي بتوجعهم مثلاً!!

وبعدين....

ليش هس فطنتوا 

ليش كل شغلة بدكم تستغلوها فش مجال تعملوا شي للوطن هيك بدون مصبحة 

وين ال ٢٤ الف طالب الي في الجامعة، علشان كل الطلاب الي شفتهم في المسيرتين بوصلوش ١٠٠ واحد 

الي بهمني، متحملوش جميلة للوطن والشعب والتاريخ ع اساس انتو اتضلمنتوا مع خضرعدنان، علشان انتو معملتوش اشي، وبعدين لازم تفكروا بطريقة مختلفة وما تسمحوا للتفاهات هاي تصير مرة تانية. 

٦١ يوم // وجبع

٦١ يوم

السيد الرئيس التقى في اهل الاسير خضر عدنان وحكى للمعنين يبلشوا بالتنسيق من اجل الافراج عنه،،،، انو جد!! من ٦١ يوم والزلمة مضرب عن الطعام وانت اعطيت الامر هس، بديش احكي انو الاسير خضر احسن من غيرو بس هو لازم الاسير يوكل هوا علشان يصحله مثل هيك تعليمات، مش كل اسرانا لازم نحاول نفرج عنهم، ع سيرة الاسرى كنت من اكم سنة بفكر، ليش عنا منهاج فلسطيني وكمان عنا تربية وطنية ومالهمش دخل في الاسرى.  

ع كل حال يا خضر عدنان

"حاصر حصارك لامفر 

سقطت معدتك فالتقطها 

وأضرب عدوك لا مفر 

فأنت ما زلت حرٌ وحُر وحُر"

#KaderAdnan

حادث جبع

كحادث ممكن يصير الف سلامة ع الجرحى ومش عارف شو احكي عن الي توفوا الله يرحمهم، بس الناس الي كانوا هم اتأخروا لتنهم وصلوا ولا كيف، علشان اسمعنا تصريحين ضربن ببعض الاول بحكي انو اجاهم الاتصال ع الساعة ٩.٠٥ صباحاً والتصريح الثاني بحكي انهم كانو هناك ع الساعة ٩.٠٧ صباحاً علشان الاتصال كان ع ٨.٥٤ يعني ١٣ دقيقة مع ازمة قلنديا وكل هالاشياء، وبعدين شو معنى انو رام الله ما فيها غير اربع مراكز دفاع مدني، طيب خلينا نحكي عن معالي الوزير، وزير الصحة من اسبوع حكى ع تلفزيون جيرانا الاسرائيلين الطب عنا متقدم احسن منهم، انو له يا زلمة، طب ليش اليوم بتحكي انهم اعقوا الاسعافات، وليش وديتوا حدا ع هداسا، بعدين التضخيم تبع القصة واكثر من عشر شهداء ليش؟؟ ليش ضروري تحكوا هيك ولا علشان تبينوا انو حادث مقصود من الاسرائيلين، برضو يمكن تستخدموهم بالمفاوضات مهم زي غيرهم بس المشكلة انو طلع الشوفير عربي. 

بالنسبة للدوحة

"و أخيراً أتفقوا" 

عنوان جريدة القدس مبارح وبالاحمر العريض، انو مرحلياً حلو انهم اتفقوا،،،، بس ع شو، اتفاق الدوحة بحكي عن انو بدهم يعيدوا تشكيل منظمة التحرير ويفعلوا دورها هاد بنفس الوقت الي رح يكون فيه انتخابات تشريعية وتنفيذية، هلأ دولتنا بتفدر ع ثلاث انتخابات بنفس الوقت!!!!

وثاني اتفاق انو تتشكل حكومة مستقلة علشان تسهل الانتخابات الرئاسية والتشريعية، ومش بس هيك علشان تعمر غزة، انو اوكي انتو حرين معنديش مشكلة، بس لما هي المهمة بس تسهيل ليش مالها الحكومة الحالية، بعدين شو معنى "مستقل" بتعريف الاتفاق؟؟ والسيد رئيس الوزراء، كيف رح يأدي القسم لرئيس الدولة؟؟؟

بس هاد مش قصة بالنسبة للأتفاق الثالث الي هو تشكيل لجان،،،،، هاي مالهاش مبرر في المرة، هو كل اسبرعين في عنا خمس ست لجان جديدة وتاريخ صلاحية الوحدة شهرين، يعني شو رح نستفيد منهن!!!

وفي لجنتين حبيتهن ع وجه الخصوص، لجنة المصالحة المجتمعية، ولجنة حرية العمل، يعني ع اساس عنا وزارة عمل كاملة ووزيرها بصرح وبسب، لشو عاملين لجنة؟؟؟

والسيد ابو مازن حكى عن اطلاق سراح ٦٤ اسير،،، يعني هاي لحالها بدها فتوى، أذا هذول المساجين مش عاملين أشي ليش أنسجنوا؟؟ وأذا عاملين أشي ليش يطلعوا؟؟ 

وبعدين بالنسبة للدوحة مش هي نفس الدولة الي من شهرين نزلت دولتنا ضفة وغزة ع دورة الالعاب، ومش هي الي مبارح حكى مندوبها في الامم المتحدة ورد عليه المندوب الروسي "أذا بتستمر بالحكي مش رح يكون بعد اليوم في اشي اسمه قطر، أعرف حجمك وانت بتحكي معي"

أنو بس بدي أحكي أنا مش ضد المصالحة، بس في العادة المصالحة الوطنية بتصريش في مبادرات خارجية، بس ضد انو الدولة تكون هيگ، كيف ما أجت أجت. 

الدفع بالشيكل،، يا مواطن

ع ورقة قد الدنيا في وزارة الخارجية، في دائرة نابلس، مكتوب "الرجاء الدفع في الشيكل فقط" طبعاً هاد الحكي اذا اندليت الدائرة اصلاً، بما انك تبقى قرفان من المتاهة الي معيشينك فيها، بتلاقي هاي الاستقبال، أنت كمواطن فلسطيني بتشتري طابعين علشان تصدق شهادة، واحد بالدينار والثاني بالدولار، ولازم تدفع بالشيكل، أنا فكرت بالموضوع طلع معي علشان العولمة، يعني اشراك اربع دول في توقيع ع شهادتك، صبابا، ما تحكيلي انو بربحوا شوية اغورات زيادة، أصلاً ما بصير نفكر هيك. 

بالنسبة للشهادة تبعتك هاي لازم انت تصدقها من التربية والتعليم العالي، يعني برفيديا، فأذاً أنت بدك تروح ع اخر الدنيا، حتى لو ما كان مشوارك بيوم مطر مثل اليوم رح تتغلب. 

أما مش هاد المحبط، المحبط أنو انت بتروح ع رام الله تعمل معاملة في وزارة الاقتصاد الوطني، بتطلع عليك بشكل غريب وبحكيلك احنا نقلنا ملفات الشمال ع نابلس! 

وانت بتروح بتتقاجأ وبتسأل، من زمان هاد الحكي؟ 

وبجاوبك اخينا؛ اه من أول الاسبوع!!!

وأنت علشان تخلص شغلك بتنزل ع نابلس وبتوه تا تلقى الوزارة، مقرها جاي بعمارة بحدها عمارة ومن الجهات الثلاث فاضي، فإخوانا حاطين الكارمة تبعتهم ع الجهه الي فيها عمارة، فأنت لازم تمرق من بين العمارتين بالصدفة علشان تكتشف الوزارة، بس مش هون المشكلة بتقدم وراقك وكله تمام وبتحضر حالك تروح علشان المعاملة بدها ربع ساعه وبتكون جاهزة، ولا هم بحكولك احنا بدنا نستنى موافقة رام الله تعال بعد يومين. 

وبعدين في كل البلد مستحيل تلاقي وزارتين في تفس المبنى، إلا وزارة العدل ووزارة الخارجية، بس بشهر آب السنة الماضية ابعدوهن عن بعض شي اربعة كيلو. 

يمكن تكون هاي من ضمن خطة وزارة الموصلات، يعني بتبعد المسافة فالمواطن بكون عنده ثلاث خيارت، أما بوخذ تكسي وبهيك بدعم التكاسي ووزارة الموصلات، أو بروح بسيارته وبدعم هيئة البترول، أو بروح مشي وبحرك جسمه، علشان يحافظ ع صحته وهيك بريح وزارة الصحة. 

انت ركز بالافق الي وصلناله.

انو ومش بس هيك؛ مبارح اخذت كتاب من وزارة الداخلية لجمعية غداً أفضل بحكي أنو وزارة الاختصاص هي وزارة التربية والتعليم، فأنا بروح هناك ولما بسأل بحكولي فش منو هاد الحكي، بطول الكتاب وبورجيهم اياه بحكولي أحنا ممرش علينا شي دي هيك روح راجع الداخلية،،، وقمة المأسة انو انا كتبت في الجمعية انها ثقافية يعني لازم تكون وزارة الاختصاص وزارة الثقافة، وهاد الترخيص الي طلع بعد سنه، وبدك تمشي وراقك عند الامن وبرأة ذمة وضريبة القيمة المضافة وضريبة الجمرك، والمخابرات والامن الوطني، والقضاء؛ يعني سؤالي أنو جد هاد الحكي ضروري؟؟ 

ولما هو ضروري ما تعملوا ممجمع وزارات وتريحوا الناس؟؟ 

جبرلة الفكر الكروي الفلسطيني.

انا حكيت انو لازم امشي جنب الحيط، بس بصراحة الحيط وقع علي، فأكيد فش مفر ولازم أحكي. 

أنا سمعت وشفت زي الكل التخبيص الي كان ع قناة اسرائيلية للسيد جبريل الرجوب، وكون الموضوع اجا بالسياق الرياضي اول ما اجا في بالي اللاعب فيرون، فيرون لاعب ارجنتيني كان الارجنتينين يعامله كـ خاين كونه لعب في مانشستر يونايتد الانجليزي، فبعد ٣٠ سنة على حرب الفوكلاند بين برطانيا الي بتحاول انها تحتل جزر المالوين الارجنتينية ما نسيو الارجنتين ولا الانجليزي انو في بينهم حرب، وهاي الحرب هي السبب في أنه اللاعب جبريل باتيستوتا حكى قبل مباراتهم مع أنجلترا "هذه ليست لعبة، أنها حرب لكن على مستطيل أخضر"، وأظن أن السيد جبريل الرجوب لم ينسى بعد مبارة ايران وأمريكا في تصفيات نهائي كأس العالم عام ١٩٩٨ المبارة التي جعلت اللاعب حميد ستلي بطل قومي في ايران، وجعلت لعبة الكرة أكبر معركة سياسية في تاريخ كرة القدم. 

علشان عندي نظرية الدوري الاسباني انو اهم شي في الدنيا بالنسبة للمشاهدين العرب، بدي اذكره بموقف برشلونا او مدريد من قضية الاستقلال الكتلوني وكيف بتأثر ع اللعبة، وكيف خلت الشرطة المدريدية تفوت ع غرف الغيار وتضرب اللاعبين البرشلونين في المبارة الي معروفة بـ (١١-١) ما بعرف اذا برضو لازم احكي عن لما اتحاد ابناء سخنين لما أخذ الدوري وكلنا صرنا نعلق صوره في بيوتنا، ما بعرف اذا هذوول بكفن علشان في كمان أمثلة وملان. 

لو كنت بتفكر انو الرياضة مش سلاح بتبقى غلطان إلا أذا الاتحاد برضو موقع ع أوسلو، أنا مش رح اقول انو لا بدنا اياك ولا بدنا رياضتك، لا الرياضة مش الك، بعدين انو شو بالنسبة لسيدات الوطني "الفدائيات" كل البهدلة الي اتبهدلنها مع الاتحاد بتيجي هيك اخرتها، انو ما بصير، والبنت الي بتلعب في شالتها شو رح يكون وضعها في المنتخب المنفتح تبعك. 

اللعب شي والمبادئ والسياسة شي تاني، انت ما بحقلك تفرض على بنت شو تلبس ولا حتى تقترح، وكمان ما بصير واحد بمستواك يحكي بهاي الطريقة الي ما بتعبر غير عن لامبلاة واستهتار في الناس الي بتحكي عنهم، طبعا هاد غير انو انت بتطلع ع التلفزيون الاسرائيلي، بدي اذكر انو لو انت بتحب الاسرائيلين انت حر، بس مش وأنت رئيس أتحادنا، هاد إلنا للفلسطينين فلازم تحترم المنصب الي حضرتك فيه. 

بس بدي اسأل الكلاسيكو الاردني بين الوحدات والفيصلي إلو معنى سياسي وأنك تطلع ع القناة الخامسة مالوش مثلاً؟؟

هو اجملاً من ١٩٩٦ وانا مش فاهم كيف كل هاي الاشياء أجت. 

يا سلام يا سلام سلم

بحكي أنو

لا للمفاوضات، متفهمونيش غلط علشان انا بدعم توجهكم كثير، حلو يكون عنا شباب واعي وبترفض المفاوضات، في سنة ١٩٩٣ الشباب أعترضوا ع المفاوضات بس ما لحقوا موقفهم للأخر، بتمنى انو ما توقفوا علشان

"في يدينا بقية من بلاد 

فأستريحوا كي لا تضيع البقية"

أعتصام في بيرزيت، برضو فكرة حلوة أنو الشب يداغثفع عن موقفه حتى في جامعته، كون البلد بدها قادة لازم تمدح الي بقوموا فيه الطلاب، لكل واحد بساعدهم وبحكي عنهم وبصورهم او حتى بدعيلهم في صلاته ألف شكراً 

بس الجملة المعترضة تبعتي،،، ليش هدول الشغلتين كل الناس بحكوا فيهن إلا تلفزيون فلسطين؟؟

يا سلام يا سلام سلم

انو جد شو هالايام الي وصلنالا؟؟

بما انو احنا شعب بقدر الظرف السياسي الي بمر فيه، رح نبقى منطقين ومش رح نحكي ارفع الراتب وهاي الاشياء -بغض النظر انو ارتفعت الضريبة- بس شو بالنسبة للأسعار؟؟

الشعب حرام يجوع علشان "الجوع كافر". 

يا رايح صوب بلادي

قهرني واحد وانا اجادل فيه عن موضوع المقاطعة لإسرائيل بحكيلي مهم كبار البلد بسهروا بإسرائيل. 

طيب لما بسهر بإسرائيل شو بحكي، معقول انو حكالهم عن ارض سيدي الي كانت جنة، او حكالهم عن بيتك الي سيدك ورثك مفتاحه ولا عن البرتقال بيافا ولا عن بحر عكا، ولا عن دار عمي الي بيني وبينهم في جدار، ويمكن انو كل هاد مش مستاهل يسم بدنه في هاي الليلة وينكد وهو يأرجل!!!

كل مرة بقوول لشو بجيب لحالي هالنكد، بس لما بتطلع ع الجنة الي كان المفروض تكون إلي.... ، يعني انت شو رأيك؟؟

بس بدي احكي انو اليوم الموضوع كله مش زابط، حتى اني مش عارف احكي، بس برضو بعرفش أسكت، بعدين مش مقالتي لحالها في هالبلد الي هيگ أجت. 

إعدس وإبصل

لما تصير كرتونة البيض ٢٠ شيكل وهي طبعاً ارخص شي في البلد فبدنا نوكل عدس. 

لو أنك متابع المحطة الوطنية رح تكون شفت تقرير العدس الي هو "المرتبة الخامسة من حيث الافضل صحياً في العالم" حسب إدعاء التقرير طبعاً الجملة نفسها غلط ومش منطقية بس بدنا نمرقها، وفي التقرير بحكوا انو "العدس احسن من اللحمة" طب ليش ما يبيعوه بـ٨٠ شيكل ويخلو اللحمة بـ٥شيكل، طبعا لازم تنسى موضوع البصل علشان بتقدر تلقط من السهل او تسرق من ارض جارك.

بس بالنسبة لإنو العدس بينطبخ ع نار هادية من وين الشعب بدو يجيب ٨٠ شيكل حق جرة الغاز!!

٤ اسباب علشان مأصيحش

السيد محافظ سوق المال الفلسطيني بحكي انو احنا لازم نرجع نستخدم الجنيه الفلسطيني، هاد الحكي حكاه في برنامج فلسطين هذا الصباح ١٦/١/٢٠١٢،،،، في البداية طاقم هاد البرنامج مش مستجيب  لموضوع الصور الي لازم تكون من فلسطين. 

بالنسبة للسيد المحافظ، انا زي اي حد تاني في الشعب بتمنى اني مشفش الشيكل الاسرائيلي، وانو يكون بايدي عملة بلدي الي بحبها، وموضوع العملة هو اشي من الاشياء الي كنت افكر فيها لما السيد الرئيس بلش يحكي عن ايلول، والاسباب الي خلتني مأصيحش مع البقية دعماً للقرار يا سيدي المحافظ، انو بلزمنا: 

١. أقتصاد؛ يعني فلسطين او ما تعرف بالضفة وغزة حالياً إلها منفذين ع العالم الي هن جسر الملك حسين و ميناء رفح البري، والثنين لازم نمر من الجسر الاسرائيلي، والرقابة والجمرك، يعني مش فاهم شو معنى اقتصاد، واحنا تجارتنا بتيجي ع مينا حيفا، بموجب معاهدة باريس الاقتصادية، أو حتى لو افهم هاي ممكن اهضم الموضوع شوي، كيف بنقدر نعمل اقتصاد وهو اي حدا في البلد ممكن يستورد من الصين بدون رقابة ولامقايس ولا حتى تحديد اسعار، أو كيف بكون الشعب بنتمي للمنتج الاسرائيلي.  

٢. جيش؛ مش رح احكي كثير عن الموضوع كون العساكر مش مقصرين، بس احنا الجيش عنا ممنوع يكون في المواجهه ولو واحد واجه بتعاقب، شو معنىانو العسكرية ما بتوفر الحماية للعساكر وبحاولوا يحلو مشاكلهم الي بتصير كونهم بطبقوا القانون بشكل شخصي، وليش اصلاً في جيش في البلد، المفروض ما نشوف غير الشرطة، بس الي مش عارف افوته في دماغي كيف السلطة بتفاوض في واحد تافه انو يسلم حاله. 

٣. مؤسسات؛ دولتنا العزيزة ما فيها مؤسسات مثلاً مؤسسة أسر الشهداء هي جسم نقابي،. بشتغل اكثر من الجهه الحكومية الموجودة علشان تهتم فيهم، وبصراحة انا أتفاجئت انو في اشي حكومي لازم يكون مهتم في الموضوع، الاغاثة الزراعية اهم من وزارة الزراعة، بس لو انت متفاجئ كيف بتكون NGO اهم من وزارة، شو مع انو د. سلام فياض اهم من وزارة المالية. 

٤. التعليم؛ ملان عنا جامعات ومدارس، بس في المدرسة صار منهاج جديد قوي اكاديمياً، بس وطنياً وثقافياً وضعه متشدش ايدك، يعني انا شو بدي في الطفل الي ما بعرف عن فلسطين حتى لو كان فهمان، يعني لو بقدر يعمل فرق كيف المفروض يعمله  او حتى يعرف وضع البلد. 

أنو بس بدي احكي سيدي المحافظ انا بتمنى انو نحل المشكلة ونوخذ الدولة زيك وزي اي فلسطيني، بس برضو بهمني مكنش عايش بوهم علشان هيك هاي المقالة هيگ أجت. 

أشياء هيگ أجت.

قانون التهجير 

قانون الضرايب الجديد، نازلين في اخوانا في التشريعي، وكل البلد بتسب على القانون، د. فياض مبارح حكى ( ع المكشوف ) ووضح انو هاد القانون مش رح يطب في الي رواتبهم عالية،،، بس انو انا بدي اسأل شو الوضع مع الناس الي معندهمش رواتب. 

مطجات ع الطريق.  

٣٤ مطب في الطريق الى جنين من نابلس، السؤال الي بدي اطرحه، قد ما طرحني، هل الطريق الواحد بعرف يسرع عليها؟؟ هل الناس سياراتهم ببلاش؟؟ هل منطق انو ينحط هلقد زفته بالطريق، والطرق الي في نص البلد فش فيهن زفته؟؟ !! 

اكل بالاقساط. 

الخبز ٤، الحليب ٧، اللبن ٨، الجبنة ٢٤ بتخيل انو صار لازم يعملوا وزارة للمواشي، جد انو ما بصير هيك، غير سعر المحروقات، والموصلات والاكل والخضار، يا أنو بتنزلوا هاي الاشياء قروض ع البنك، أو انو ارفعوا الضريبة عليهن وخلوهن زي المعسل والدخان  مضرات بالصحة.  

الاتحاد الاوربي. 

حاليا ع شريط الاخبار في تلفزيون فلسطين، (صحيفة الانديبندانت تكشف تقرير داخلي في الاتحاد الاوربي؛ اسرائيل تهدد وجود الفلسطينين في منطقة c، وتقوض حل الدولتين)، بصراحة Like هي من ٦٣ سنة كاينه تلعب مع الفلسطينين بلياردو، زي كا أنو في المناطق الثانية وضعهم صبابا، وبالنسبة للحل وما حل، اكثر شي ممكن الواحد يحصله في هالايام عصير حل. 

مهو فش غيرنا. 

من اكم يوم حكيت للأتصالات انو يجوا يشوفوا خط النت، طبعاًاطلعوا المشكلة عندي وهي عندهم،،، بس قبل ما يروحوا حكوا؛ يعني مهو فش غيرنا في البلد،،، لازم احنا يصير فينا هيك، علشان عيون حضراتكم.  

صالح أو لا تصالح

مصالحة،،، أغنية لفيروز في سهرة الحب،،، وانا بسمع فيها من شوي اجت عبالي فكرة، فكرة من افكاري الغريبة الي هيك أجت. 

شيخ نصري وابو صالح تقاتلو ع جورية الي كانت تحب الفران وشردت معه،، يعني اختلفوا ع اشي مش الهم، ودق زعل حتى فيروز نفسها ماتت تنها حلته، بس كان في شغلة يا عالم. 

والزير سالم اخوه الكبير حكالوا لا تصالح، وراح قاتل ولاد عمه علشان كبرت راسه، وشو استفاد ولا اشي، أكل هوا. 

وبالنسبة لحضراتنا كفلسطينين ع شو متقاتلين؟؟؟؟

ولشو بنروح ع سوريا وقطر ومصر نوقع اتفاقات مصالحة؟؟؟؟

وليش كل العالم بفلسطين ضد الخلافات العائلية، مهي نفس الاشي، الطرفين غلطانين، وبدافعوا عن ولا اشي، ليش هدول مسموح وهدول ممنوع؟؟؟

الي بدي احكيه انو،،، ما في داعي للمصالحة ولا لكل هالاشياء، ممكن تتفقوا ع كل اشي بدون ما تكونوا بتحبوا بعض، وع فكرة احنا كشعب مش رح يفرق علينا اشي الي حبيناهم رح نضل نحبهم والي كرهناهن رح نضل نكرهم، المصالحة مش رح تغير ابداً. 

بس بصراحة اشي سيء ع الاخر انو اصحى الصبح زي العادة بفتح ع تلفزيون فلسطين القى،، حماس مش راضية تفوت وفد فتح ع غزة،، والله كثير هيك، غزة الكم مثلاً،،، بعدين، انتو عالميا اكثر منطقة في العالم فيها سكان ( الاكثر كثافة ) وقفت ع هدوول الثلاث،،، وحياتكم هاي ملهاش وجه. 

وكمان المصالحة بصيرش يكون معناها انو السلطة في الضفة او في غزة ما تحاسب المذنبين، علشان ما في حدا فوق القانون علشنه ابن الحركة الفلانية، ولما حدا يتحاسب علشان غلطة غلطها بحق البلد بصيرش نحكي عن الي بحاسبوه مجرمين. 

انا كفلسطيني مبتهمنيش المصالحة، وبطلبش من حدا يحب حدا بس كل الي بهمني اني مشفش فلسطيني بضرب بفلسطيني، انو مسمعش عن واحد رفض وجود شرطي او تدخله علشان الشرطي من حركة تانية،،،، بتهمني القضية الفلسطينية اكثر من اجتماع في فندق في شرم الشيخ، بتهمني الناصرة اكثر من المصالحة الوطنية. 

علشنا كلنا ولاد البلد لازم نتحمل بعض، وكلنا لازم نحكي للغلط انو غلط، ونشد ع ايد الصح، بس طبعاً بدون ما حدا يعترف انو قرأ هاي المقالة الي هي اساسا هيگ أجت. 

انساني ولا فلسطيني

أنو بس بدي أحكي،،،

بنحكي عن اسرائيل 

 انو احسن منا - وقوم الله المختار - عندهم نظام وعنا زباله -

 يا زلمة روح شوف كيف عايشين - يصحلي هويتهم وبديش اشي من الدنيا- لو البحر معنا مكنش بزبط هيك،،،، انو ع فكرة البلد خربانه من حضراتكم، لو بتحبوا البلد بتنظموا حالكم او بتنظفوا شوارعكم. 

بضاعة اسرائيلية 

 هاي سمعتها اليوم في الحسبة، انو اتفاجئت شو بضاعه اسرئيليه في الحسبة بدو يكون،،، طلع اخينا ببيع مواد منظفات، ومش بس هيك هاي المواد شغل جنين، وللي مش مصدق بوخذه ع المصنع الي جاي بتسوية في دار صاحبي،،، بس الي مش فاهمه، شو بتساوي المنظفات في الحسبة. 

مواقف وتصاريح

موقف؛ أنسى انهم محتلينا بس اسرائيل بتجنن للسياحة والسهرات. 

موقف؛ اي نعم انو جندي بس لازم تتعامل معه عادي وترد عليه. 

موقف؛ (أكثرهن استفزازاً) انساك من انو عدو بس لما بدك تنظر لشخص او حزب في اسرائيل لازم تنظرله بأنسانية. 

وجهه نظر؛ / مش لازم يكون رقاصة روسية يهودية ووسكي علشان تكون سهرة / الجندي صحوه بدري علشان يسم بدنك / كيف انسى؟!؟!؟!؟

تصريح: أنا فلسطيني قبل انسانيتي وقبل اهلي حتى، مبحكيش عبري علشنها لغة محتل، ومبوكلش منتجاتهم علشنهم قتلوا ابن عمي، وسكنوا في الجنه الي كان لازم اكون فيها، متطلبش مني اكون انساني اذا حكيت عن هرتزل، علشان انا لساتني مبعتش القضية،،، وع بلاطة مش رح ابيعها. 

سنفروا بحياتكم

مش بس الي حكيته في المقال السابق،،، انو بدي اكمل وبتمنى مرة تانية انو نعرف انو هالحكي غلط وما في داعي نضل نعمله،،، طبعاً لو وجهه نظرك مخالفة للي بحكيه فبكون ممنونك اذا سمعتها. 

٤. غابة السنافر 

طبعاً بحكي عن الجامعات، وتحديدا عن الطلاب في الجامعه، الي هم عنجد عايشين في مملكة السنافر،،، | مش بس طلاب السنه الاولى | الفكرة في الرسوم المتحركة الي بتصير في جامعاتنا، وعلشان نبلش فيهم؛

سنفور حرّيث؛ هو الطالب المجتهد -زيادة عن اللزوم- فلته كتب طبعاً مبتشوفوش في الجامعه إلا في المحاضرة، حتى في المكتبه ما بتشوفه علشان كمان هي مش فاضيلها، بتضيع وقته، غالباً بكون قاعد في اول المحاضرة بحد طاولة الدكتور، بجاوب كل الاسئلة في المحاضرة إلا أذا سألته؛ نروح نتغدى بالكافي شوب؟؟؟ طبعاً يا شاطر منتا سألته سؤال برات المنهاج، وطول عمري كنت افكر انو هاد الطالب لازم يكون الاول ع الدفعة او من العشرة الاوائل،،، لتني اتعرفت بشب "جيك" من الاخر وبعيد المادة مرتين وثلاثة،،،، بس احلا شي فيه انو بتعين الامتحان بعد اسبوعين،، فبرفع ايده يقوول (مس مش حرام هيك تعملي معي هاي بتكون فترة امتحانات وبلحقش أدرس). 

يزداد تركيز هذا النوع من السنافر في بيئات كليات العلوم الطبية والهندسية والتطبيقية.  

سنفور ساحة؛ وهاد النوع من انواع السنافر هو جاي ع الجامعه مش علشان يدرس، بس بدو يتعرف ع الساحات، ضميره رح ينأبه اذا ترك الساحة، مكانه عنوان ثابت، يعني لو انت قعدت بالغلط محله رح يحكيلك ( ممكن،،، انا هون بقعد من اربع خمس ثمن سنين) واخينا بفطر وبتغدا في نفس المكان بشرب قهوة وكولا، في نفس المكان وطبعا متتفاجئش لو فتح كمبيوتره علشان يسمع موسيقى غريبة وبصوت عالي، او يفتح ايميله، برضو اكيد انت ما بتقبله يروح ع المكتبه. 

يزداد ظهوره في كلية التجارة والكليات الانسانية. 

سنفور فايع؛ طبعاً هاد اشكال انواع، بوت all stars بالاضافة للواكس والفيبر والجل المبالغ فيه، لازم يكون بوته احمر او ازرق علشان بحبش الالوان الجامدة، بلوزة زهرية او عليها صورة مغني،،، وفي بعض الحلات سبونج بوب، لازم يكون لابس بوكسر فايع فطبيعي علشان تتعرف على بوكسره يسحل بنطلونه، طبعاً صديقنا الفافي صوته ناعم، وبيزعل منك اذا اتطلعت ع حبيبته، طبعا ما عنده مشط في البيت علشان هو بمشطعند حلاقه كل يوم الصبح،،،، ومش هون المشكله،،، بتلاقي في بنات بعجبهن وبصرن يحبنه. 

سنفور حزبي؛ هاد النوع من السنافر ما بلزمه من الجامعه إلا انو يكون في المجلس، واكيد بهمل دراسته واشيأه التانية في العادة علشان الحركة الطلابية،،، وحتى ما بكون عارف يتواصل مع صحابه،،، انو اه ما بيزبط هيك ،،، بس والله بعجبني علشنه في العادة بني ادم مبدأي. 

سنفور تطقيس؛ وهاد شغل بنات، بقعد خمس سنين في الجامعه، يفتي في موضوع البنات، هاي حلوة، هاي بتحب، هاي ....، وهاي بعرف اخت صاحبتها،،،، هاد النوع من السنافر بعرف شو ملابس كل بنت في الساحة الي في العادة بكون فيها، وطبيعي انو يحكيلك انو بعرفهن كلهن، وهو اكثر مرة حكى مع بنت طلب من دفتر يصور المادة. 

سنفور روميو؛ وهدول السنافر مسجلين في الجامعة بس لما يبقوا يجوا بكونوا مستعجلين وبوقفوا مع ١٣ بنت ع الطريق، لو رحت ع اي كافيه شوب حولين الجامعه بتلاقيهم، طبعا نادرا تلاقي في تكرار في القعدة، كل مرة مع حدا جديد، ع الاغلب هم بفكروا بطريقة غير طريقتك، وبتعامل مع الكل ع نفس الاساس. 

سنفور مثقف؛ هاد السنفور بتلاقيه في الجامعه طالع من المكتبه، او فاتح كتاب وبقرأ في الساحات، طبعا بقرأ في كل شي إلا كتاب الجامعه،يمكن تلاقيه مع وفد اجنبي، وفي العادة ممكن يطنش محاضرة علشان يناقش حدا، طبعاً في عوامل لتحديد اي نوع من السنافر أنت. 

سنفورة ع ل ش ا ن ك م؛ هاي السنفورة شايفه انو شباب الجامعه مقطوعين ومحرومين، فهي بتلبس ع الموضة،،،، طبعا هاي الموضة بحددها الاواعي في محل ديكوره مزعج، مش مهم شيغير انو الشباب يتطلعوا عليها، فيزون والالوان غريبة مش مناسبات لجسمها، عطرها الستاتي الثقيل الشتوي بتحط منه كثير وفي الصيف، ع اساس انو بلفت الانتباه،،،هو بلف الدماغ وبخلي الواحد يستفرغ، طبعا حسب قديش قريبة منك، وعندها معضلة عميقة في موضوع المكياج،،، ووجه الشبه بينها وبين سنفورة في الكرتون،،،، الثنتين كل السنافر بدهم يزبطوهن. 

أنو بس بدي احكي، لو انت حدا تاني غير هاي السنافر فشكله الله راحمك من القصة انشالله،،، طبعاً مشكله لما يكونوا هدول طلاب الجامعات ومستقبل البلد،،، وما حدا يزعل علشان الاشيا البي بكتبها عثث هيگ أجت. 

بالكم في 2012 بتغير الوضع

هاي الاشيا هي من اشيا كثيرة بنشوفها من زمان، بتمنى انو تنتهي في سنه ٢٠١٢، طبعا هاي اول جزء، علشان عندي حكي كثير عن اشيا غلط ما بصير تضل علشان هي غلط. 

من هاي الاشياء:

١. بلا ولدنه

كنت في الجامعه لما بلشت السنه الي عدت، كانت عندي مشكله كبيرة الي هي الدكاترة الاطفال، بعرف انك متفاجئ ويمكن بتشك في الحكي الي بحكيه، بس انا بدي احكي و"أجري ع الله"، لما الواحد يكون دكتور ممكن يصاحب طالب عنده بس برا المحاضرة، اما انو يكره طالب ويأثر هاد الحكي ع علامات الطالب جد اشي عيب، وكمان شغلة بحب احكيها للستات الي مفكرات حالهن حلوات، انو الطالب الي بتفرج عليك في المحاضرة هو بدو يسمع شو بتحكي علشان يتعلم، مش معجبه جسمك. 

٢. شوارع المدينه

ملان عندي حكي عن مدنا الفلسطينية العزيزة، بس انا رح احكي بس عن شوي من مشاكلهن،،،،، 

الدنيا مطر؛ الدنيا مطر في بلدنا يعني، الشوارع ملانه مي، مش فاهم شو مشكلة مصممين الشوارع مع تصريف المي، طبعاً مشكلة البلدية أول أخر، وع سيرة البلدية خليني احكي عن بلدنا جنين، كل الشوارع في البلد مسابح في الشتويه، إلا شارع الحسبة، شارع الحسبه عزيزي القارئ (لبصة) يعني لو انت غامرت وفتت فيه بالمطر رح تطلع بني، والحمد لله،،،، ما تحكيلي مهي حسبة، هاد اشي غلط، بس الي احلا من هيك انو مين لازم يمر من الشارع؟؟ طبعاً اي واحد رايح ع وزارة الاوقاف، او طالب في مجمع المدارس الي تحته، او اي حدا رايح ع الجامع الكبير، وطبعاً اي ححدا بدو يشتري خضرة وفواكه، يعني كل البلد،،، 

شوارع مطبشة؛ ما في شارع في جنين طبيعي كله اسؤ من كله والله اشي مزعج طبعاً لاي حدا مش من جنين وانت فايت عنا ع البلد رح تلاقي التطبيش ابتدءاً من عند البلدية،،،

سلال زباله فاضية؛ برضو في جنين بتلاقي السلال فاضية، علشان كل الزباله في الشارع، شباب مشان خاطر البلدية جربوا مرة والله مش حلوة،،،

محلات كشف؛ (البسطات) في العربي، طبعا هن كنن بسطات من شي خمس سنين بس اليوم صار فيهن اشيا اكثر من اي محل وطبعا مذايق الشارع 

انو وين البلدية؟؟؟؟؟

٣. شعر واقف وبنطلون ساحل 

اوكي شباب القصة مش بالشكل، بس انو الي بدي احكيه، انو والله مش حلوة منك، فكر براي ابوك بخيبة امك، انا زي زي اي حدا في الشارع، بحب لما اشوف واحد في الشارع احس انو مش فافي،،، في فرق كبير بين الفياعه والنياطة عزيزي. 

انو بس بدي احكي هاد الاشي ممكن كان صار معك، او في بلدك، وعلشان بلدي جنين هيگ أجت. 

Like, Unlike #Palestine.

Like 

دعايه جوال

انا متفق معكم انو جوال (الشبكة الوطنية الاولى) بتتهبل في اعلاناتها ودعاياتها، وسبق اني كتبت مقاله عن دعايه رمضان، بس الدعاية الخاليه لجوال بتجنن، (جوال راعي المحترفين) بحكي لأخي الصغير من شوي،

-أحنا عنا لعبه اليوم؟

-لا ما في اليوم، الفريقين خلصوا لعب هاي السنه، واليوم اصلا جمعه. 

-أنا بحكي عن أتحاد رمانة. 

-انا فكرتك بتحكي عن برشلونه وريال مدريد. 

أنو كل اللعيبة الي بنعرفهم بلعبة في الدوري الاسباني، او في كأس العالم، وبنعرفظ ابطال البلد، فحلو كثر من جوال تخلي الناس ينتبهوا انو ابطالنا هم هدووول، ونعرفهم،،، وما حد يحكي اني بخطط الطش الي عليها إسماعيل العمور.

الله معكم ابطال فلسطين.  

Like

#Onlyingaza

لو عندك تويتر وتشوف الشباب شو بحكواعن غزة في (بس في غزة) بتلاقي شي رهيب، شباب بكتبو عن اشيا في غزة ومش عاجبتهم، بحكوا انو لأ، كل الاحترام الكم، كثير حلو رأيكم والاشيا الي بتعملوها.  

في اكثر من # غيرها بفلسطين، وكلهن مميزات، بتقدر تشوف #Gaza #Palestine من المدونه، انو جد بلزم هيك علشان نحكي الاشي الي بدنا نوصله للعالم.  

Unlike 

الماليكانات العارية

حكومة غزة، أو الحكومة المقاله، شو ما كانت، بدأت بشن حمله ع الماليكانات العارية والصور الساقطة،،،،،، في محلات الملابس النسائية في غزة،،،، أحا، هلأ انو انتو زبطتو الوضع وما ضل في مشاكل في غزة غير ماليكان في محل نسوان،،، لما كنا في مؤتمر PalConnect الحكومة بتعاعت غزة، قطعت الاتصال مع الضفة، ولما بفتحو الاتصال، بيجي واحد يحكي انو ال blog بدها ترخيص،،، اعزائي في الحكومه الغزاويه أنو #wb3deen

Unlike

حفلة خيانه لرأس السنه 

محمد سباعنه كتب ع الفيس بوك عنده من فترة، التاريخ مثل 30/12/63، بالكم لو عملنا مثل سباعنه وبلشنا نكتب تاريخنا بالنسبة للنكبه،،، بنوصل لهون؟ 

في فلسطين، مغنية الجيش الاسرائيلي بتغني في رام الله، علشان الشباب "الفايعين" يرقصوا ويسكرواع أنغام الخيانة. 

مكنتوش مصدقين لنو لما احكيلكم ما بصير نحط اغاني بالعبري ع موبايلاتنا، ولا بصير يغني (يودا) الي هي اغنية الجيش، بس ما حدا بدو يسمع، الحكي العبري مُر ع ذاني ولا بدي ذاني تستسيغوا بس بالنسبة لإنو (تامير جال) تغني بعرس في الرام وتحي حفله راس السنة في رام الله!!!! 

في رام الله التحتا الشباب الله يكثر من امثالهم عاملين حفله فلسطينية لرأس السنه، روحوا عليها الله يخليكم بلاش نوقع ع راسنا. 

ممكن حدا يفهمني ليش ما حدا عمل مثل ما عمل سباعنه؟؟؟

أنو بس بدي احكي، فلسطين بلد فيها مشاكل وقصص، بس هاي بلدنا، ما بصير نسكت ونخلي البلد يكون وضعها زي هيگ، ونسكت ونحكي هيگ أجت. 

ثورجي صيف شتاء 2012

غزة على بالي، صورة بروفايل سوده، صور جرحى وتفقيع، واذا بتحرق عجل بصفحتك ع الفيسبوك، بتكون مواطن مثالي، بهاي الفترة من السنه. 

طبعاً ما تغلب حالك كثير روح اعمل تويتر والحق كم مجموعه نشطين، وجيب منهم لينكات، وخلي فيسبوكك يتعبى كومنتات، فالمواطن الاصلح يا ابني، هو الي عنده اكبر عدد من التعليقات، يعني (ثورجي). 

لو أنت من العيار الثقيل، بتروح ع الفليكر، وع الشباب الي بنزله الصور وبتوخذهم ع الفيسبوك، بتصير (ثورجي مرجعي). 

هاد الحكي من يوم ما بلش (الربيع العربي) لازم تعمل هيك، علشان انت ببساطة مواطن فلسطين واعي، وبتحب تخدم بلدك،،، اي نعم انو ما الو دخل، بس ليش سميناه ربيع عربي، و الفيسبوك والتويتر واللنكدإن و الفليكر، والفورسكوير والهايفايف والسكايب وباقي الشبكات الاجتماعية، لونهن ازرق،،،، وكمان مش عربيات؟؟؟

يوم الجمعه، النبي صالح، طبعاً لازم انت تروح هناك، وتحكي للجنود انك بتكرهم، بما انها مقاومة سلمية،،، مش عارف من وين جايبين الفكرة،، -ياعمي نيلسون منديلا (رجل السلام العالمي) مكنش متبع فكرة المقاومة السلمية- بعد شوي الجنود بزهقوا وببلشو يضربوا قنابل غاز مسيل للدموع، وبنخنئوا الشباب، ومقابل كل واحد بينخنئ، في واحد يحمله واربعه يصوره، وخمسة يبعثوا ع الفيسبوك وسبع ع التويتر، ع فكرة طول عمره الغاز هاد ما اله قيمه، إلا من تحت راس حضراتكم، من وانا عمري خمس سنين حكولي اهلي كيف اتعامل معاه، وبتقدروا تحملوه وتزتوه ع الجيش مرة تانيه. 

لازم تكون (افيلابيل) علشان لازم يجيك ايميل او دعوه ع الفيسبوك علشان في شي رح يصير بالوطن، وطبعاً لازم تكون حريص انك تكون في (الايمل ليست) تبعت المنظمين، علشان تبعثها انت لصحابك، ولما يبعثوها لأي حدا بتبين انت گ عميد الثورجين. 

لازم تغير صوره بروفايلك باستمرار، سوده بشهر١٢، وقنابل مسيل دموع يوم الجمعه، شجرة بشهر٣، BDS خلال مؤتمرات المقاطعه، ولازم تكتب لا لمؤتمرات التطبيع. 

وطبعاً في عدة شخصيات حضرتك لازم تضل تسب عليهم ع الفيس بوك عندك، وع التويتر وفي القعدات، طبعاً هدووول بختلفوا كل فترة مع ثبات البعض، ما في داعي احكيلك عنهم لأنك رح تعرفهم لحالك، وعلشان انا منسجنش.  

انو بس بدي أحكي، أحنا كلنا ولاد البلد، إنتماءنا للبلد مش هيك، كل شي لما يكون مبالغه ما بيزبط، أعمل الي قناعتك فيه مش الي كل الناس بتعمله، بس انا مش مستغرب ع فكرة مهي كل بلدنا هيگ أجت. 

نابلس مش زي أي بلد تانية

نهيل بتحكي عن نابلس ............. يعني ما حدا يراجعني انا ماليش دخل

في نابلس الحبيبه ،،، مش زي اي بلد تانية في الوطن المحتل ، في بنات وطبعاً في شباب المشكله انهم هالناس بفكرو حالهم عايشين

 بلبنان حتى الضيوف والزوار الي بيجو من برات نابلس بفكرو حالهم رايحين ع بيروت وانوه رفيديا هي باريس !!!

خدلك هالمحادثه ع سبيل المثال

- مبارح انزلت ع نابلس اكلتلك صحن كنافه من الي ئلبك بشتهيه والبنات البنات زي الدبان حولي يخرب بيتهم مااحلاهم والدوار بيجنن والمجمع عندهم سينما ولك حظرتلك فيلم من الاخر ؟؟

-بتحكي بجد بنات نابلس حلوات .

-.

- آه والله احلا من القطر والكنافه

ازا مش مصدئ بكرا بنزل انا وياك ومنروح منكزدر برفيديا أمن شو رفيديا هواها منعش

يالله شو نغشين بس الاسؤ من هيك لما يجوا يحكو رأيهم بأهل نابلس جماعة مغرورين بلا دين وايمان !!!

يا زلمه بحسسونا انا من اهل قريشششش وانّا منخرج بالبيكيني .

اكتر شغلة بتضحكني ، ( سما نابلس شو هاد يالله زي كاأنهم رايحين ع الفردوس الاعلى ،،، يا عمي مكان عادي طبيعي فيه شوي شجر واكمن مقعد مش هلاشي الواو يعني )

ويلا الشباب النابلسين حدث بلا حرج

الي بحكي ماما وبخاف من البابا

والي ما بئدر ياكل بزر لانوه بخاف ع سنانو

ويلا هاد هاد الغبي الي مأخي نص الحاره وكل صاحبتو بنات اشوي وبربطلوه شعراتوه ببكله

، والفيزون ع الشباب يا حبيبي شو وضعك شو بالنسبه يعني شو بدك مثلن يا عمي مو البنات لحالهم عوره ماكل منظرك عوره ولك رجل انتا رجل

وبنزل عليك الفهلوي ب الئئ وبكسر الحروف تكسسسير الصاد بتسير سين والذال زاء ولك خربو بيت اللغه .

الجميل والمثير بالموضوع انوه اهل نابلس وبنات نابلس وشباب نابلس بفكرو حالهم قوم الله المختار

مش معنى الحكي اني ضدهم او بكرهوم بس ينعن عمري والله بلبئلهم

انو انا بس بدي احكي لما يشرفو عنا اهالينا من قرى ومدن الضفة بنورو حتى احنا كمان منموت ع لهجتهم و ع الرجل الشرقي الي محرومين منوه

باللهي عليكم شو يعني (ائئوعد) مالها (اقعد) ببساطه فيهاش ايشي اقعد اجلس انكسح يا عمي اهبط

ع راسي نابلس والي بيجو من برات نابلس وبحكيلهم باريس ترحب بكم بس ياريت لو تحترمو الفافين الي عنا وما تدعسو ع كنادرهم لانوه نفسياتهوم بتتدمر ازا اتسوخت بواتهم

وياريت ما تحكو عنا كلام طالع نازل وتحسسونا انا ع جزر الهواي

وسمعونا احلا زمر

و أسفه علشان هيگ أجت.

لشو بتحكوا عبري؟

انت لو سمعت الي سمعتو اليوم كان قرفتوا حياتكم، كنت اليوم في بيت عزا لأم صديقي، هاد صديقي الي قرفوا سماه بالحكي الي مالوش دخل في الدنيا، الزلمة اتوفت أمه الصبح، وجاين تحكوا عن شي تافه بنظر الناس وبنظر اي فلسطيني فهمان مأساه، الشباب كانوا يحكوا عن التعويض الي بوخذه الي بشتغل في اسرائيل، بلله عليكم، يعني اسرائيل اخذت بلدكم وانتو بتشتغلوا عند اسرائيلي بارضكم، وجاين تخرفوا عن الموضوع في بيت الاجر، عفواً عندي سؤال لولبي، هل الحكي هاد اله لزوووم. 

لو انت كنت محلي وضليتك ساكت، كان سمعت الموضوع التاني الي فتحوه،،، سرقة السيارات، بلش الموضوع بالحكي عن واحد (فلته) وفنان،،،،، طبعاً لأنو بسرق سيارات، ويا زلمة وبعمل هيك وبشرد هيك، حسسوني انو بحكو عن الزير سالم او عمر ابن ابن الخطاب،،،، (اخشى ما أخشاه ان تصبح "السرقة وحراقة الوالدين" وجهه نظر)

طبعاًغير هالسيرة المقرفة كانوا يحطو حكي بالعبري، علشان يوهموا الناس انهم فهمانين، محمد الشب الي أمو توفت الصبح اطلع علي وضحك،،، هيگ أجت يلا هاي اطلعت مقالة الليلة،،، والله حرام عليكم 

اولاً ما في داعي انو تحكوا عبري علشان لغتنا صرلها من زمان يعني اكثر من ٦٣ سنة، شو جابركم تحكوا بلغة محتلكم، مش قصدي انكم متتعلموهاش، بس متستعملوهاش. 

ثانياً لما يكون بيت اجر ما تحكوا باشياء تافهه، علشنه مش فاضيلكم. 

ثالثاً السرقة مش فن ولا فلتنة. 

رابعاً والاهم أبو جودت،،، زلمة سأل الشباب الي بتفلسفوا في الحكي، وما حدا عرف يجاوبه،  أنتوا لشوا بتحكوا عبري؟؟؟ 

أنو بس بدي أحكي، محمد صديقي الله يرحم والدتگ ويحسن مثواها، وبالنسبة للحكي هاد اشي من هالاشياء الي في الدنيا الي هيگ أجت.